„APC a dediká atenshon spesial na penshonadonan riba dia di Penshonado”
WILLEMSTAD - Dia 25 di yüli último gerensia di APC a duna un toke èkstra na e dia di penshonado. Manera pa hopi aña kaba ta un tradishon ku APC ta duna un aporte na organisashon di selebrashon di e dia di penshonado dor di e organisashon di penshonado UPAH. Banda di esaki APC ta sòru pa na ofisina tambe penshonadonan ku bin atendé kualkier asuntu, risibí un atenshon spesial riba e dia aki..
Vishon di APC
APC su vishon ta duna kontenido na e posishon ku APC ta trahando na dje pa awor i futuro. Esta ku nos ta e ekspertonan di penshun i invershon di Kòrsou.
APC ta hopi ambisioso i ta traha konstantemente pa yega na inovashonnan. APC ta sinti su mes e lider di merkado i tin un drive enorme. Esakinan a hiba nos na e idea di posishonamentu di marka: Esta APC ta e Google di e mundu di penshun: moderno, inovativo, kreativo, fuerte, kurashi, agresivo, plasentero, ta un tim, tin vishon i ambisioso. Den un palabra Firmemente inovativo.
Un penshun di APC ta hopi variá
Riba dia di penshonado Gerensia di APC a sòru pa duna un atenshon spesial na algun penshonado. E aña aki a trata aki di 5 penshonado ku ta resortá komo number 82 riba e lista alfabétiko di e diferente produktonan di penshun ku APC ta brindá. Manera penshun di behes, penshun di biudo(a), penshun di wérfano, penshun di inbalides i penshun di biudo (a) èkstra ordinario.
Pakiko e number 82?
Ta bon pa spliká kon APC a yega na e number 82. E fondo di penshun kual tabata ántes APNA i ku despues ku Kòrsou a bira outónomo den Reino a bira APC, huntu tin 82 aña di eksistensia. I a base di esaki a bai mira riba e lista ken ta e personanan ku ta number 82 ku ta risibí un di e tipo di penshunnan ku APC ta paga na su penshonadonan.
Un apresio i felisitashon speshal
Tabata direktor athunto di APC sr. Ramiro Griffith ku a hiba palabra di apresio i felisitashon na e 5 penshonadonan ku tabata presente na APC. Despues ku sr. Griffith a finalisá su disertashon, koleganan di e departamento di servisio na kliente di penshun a entregá kada un di e 5 penshonadonan skohé un “tablet” komo regalo. Esaki mirando e echo ku práktikamente tur kos ta digitalisando i APC pronto lo bai ta kompletamente digitalisá i ku uso di papel tei bira tur dia ménos, ta motibu pa a yega na e idea pa duna kada un di e penshonadonan un empuhe den e direkshon pa digitalisashon.
E sinku penshonadonan ku a risibí nan “tablet” ta sr. Paul Burgos, sra. Angela Franken-Balentina, sra. Lidilia Heiland, srta. Shanty Trenidad i sr. Shurton Ijziek. Nan a keda hopi kontentu ku e atenshon ku nan a risibí di parti di APC. Un biaha mas APC ta demonstrá ku nos tei pa kuida kada un di e aproksimadamente 21.000 partisipantenan di kua 10.600 penshonado su penshun dor di hiba un maneho di invershon sólido i kuidadoso. APC tei pa sigui traha na bienestar di nan tur i tambe pa Kòrsou dor di duna empuhe nesesario pa revitalisá nos ekonomia hasiendo invershonnan di kalidat.
